109 年全國語文競賽原住民族語朗讀【丹群布農語】 高中學生組 編號 4 號
Teknik Ihaan Imita Iniqumisan

Maaq a “teknink” a malasAmilika tu qalinga. Pali’uni ki vaivivaivi baqlu tu tinanas’i qaimamangsut ikmama’aiun mita laupakadau. Ihaan imita iniqumisan maqtu ka teknik un mapidauzanug imita tu iniqumisan. Aupa maaq a tinanas’i tu qaimamangsuta masisihal amin, mahiav ikma’aiun mita. Musqa tu haiza intaa nitu kasihal miliskin, mapindikla imita maimasihal tu iniqumisan, a nii ata bunun mahaipi uqansaipan.

Maszang laupakadau tu “uanglu” un, maqtu a uanglu mapikmuz imita bunun tu kainaskalan, masius imita bunun tu taiklas siin qansiap, maqtu mapakisniap i nakanadaan mita miqumis daan, niin ata mataimang, pavai’an i iniliskinan. Maqtu ata makusia uanglu ti pasaqaaql i silas dalaq tu duma siduq tu bunun, pababzbaz i nitu saiqalan vaivivavi tu miniqumis. Tis’uni tu maaq aingkaa lusqa ihaan lain pababazbaz siin mapasasaiv i sasing. Nii aingka usaduan ihaan zingva babazbaz tu bununa. Madaqvas aupa? Masmuq aupa? Manau’az aupa? Nii aupa manau’az saduan? Lusqa aingka mapakahaan kalasu’, kusia tanuduq mapupuu ki tinau tu patasan mapudadaan. Maaq dau ka maqtu latuzaun tu qalinga a nitu madia. Aupa nii aingka ma’laz maqansiap tu makuaq a bunun ihaan uanglua.

Tismaupa ti, mavia ka uanglu un tu qanglas mapuliva ki bunun. Min’unin i ispulaliva bunun iniqumisan tu qaimangmangsut. Malabasin amin a bunun tis’uni ki uanglu tun minkanaang a iniqumisan.

Maaq amin laihlai, qatu’, kusbabai, siin hikuki una, isia amin Teknik tun tu kai’unian qaimamangsut. Tuza dau ka laupakadau bunun tu masvala’ daingazin a iniqumisan. Qabasang tunqatu munhaan dangqas qulbu dalaq, lauqu tau buan a tinunqatuan; laupakadau muqain mas’an nutdaa tukii a tinundazaan ihaan hikuki. Qabasang patantungu a, tunbabantasang amin a bunun, mitmuqu a hubung, Aupa madauqps dau ka inudadanan. Makusia lutbu tu tamasaz munquma, ansaqan, mama ki qaimamangsut, miqdi daingaz a bunun miqumis. Laupakadau ka bunun makusia’in Teknik tinanas’i tu qaimamangsut miqumis, manas’akin a sinkuzakuza, sina kikaia tidangaz mita bunun kuzakuza. Musqa tu maaq a Teknik una kai’uni ki ispasanpapanaq tu busul siin vakuzaang, maqtu amin mapalatpu ki nastu ti sikapaupa ka miniqumis. 

109 年全國語文競賽原住民族語朗讀【丹群布農語】 高中學生組 編號 4 號
科技在我們的生活中

科技來自日常中的種種製造。現今的科技雖然帶給我們方便,但是背後所隱藏的負面效果往往人類未能察覺的。就如同現在的「網路」,它可以豐富、方便我們的生活;可以讓我們活在虛擬的世界中,和不認識的人盡情地交談。由於彼此看不見,就沒有因身材長相的好壞而離開。因為只是透過螢幕及雙手敲打鍵盤與對方直接對話,彼此之間並未曾建立互信基礎,是好人或是壞人,雙方都不知道的。所以,網路經常被人們用作犯罪的工具,因網路的緣故,受害的人越來越多了。

汽車、摩托車、飛機、船艦都是科技的產物,真的帶給我們很多的好處。過去的人要繞地球需要幾個月,甚至要半年、一年的時間,現在只要幾日,甚至幾個小時,就足矣。記得以前要出去都是用雙腳走路,很辛苦。買東西需要用人扛起或揹起。現在輕而易舉,走多遠就走多遠,東西可以用車船載運了。雖如此,科技也帶給人類厄運與傷害,如發明戰爭的武器,更多的人類和建築遭到肆意破壞,也都是科技所撒下的惡種。

文章資訊
文章年度109
文章編號4
文章組別高中
文章語別丹群布農語
族語標題Teknik Ihaan Imita Iniqumisan
漢語標題科技在我們的生活中
文章作者余榮德
漢語摘要