109 年全國語文競賽原住民族語朗讀【宜蘭澤敖利泰雅語】 國小學生組 編號 3 號
muhi kenu

kenu na Nango go ga ble calay sokan ru ble calay ni’un, ana ga tyawun na yaw muhi kenu hani ga m’uwix calay ru piyux calay tyawun nya, arin n’arin gleng muhi kenu ga, lama ta mosa beh bisan kya bayi iyu kenu, masu bayi iyu kenu lga syalan ta posa cka tatak ru n_gon ta haka iyu kenu, mlabu kwara patas nya cka iyu kenu haca lga, t’arin mosa kmut khoni mhiyung iyu kenu la, iyat mhmut na khoni mhiyun ta kenu, maki nanak a’uw mhiyun kenu na khoni, nanu ini ta mhmut magan kmut khoni mhiyun kenu.

kwara ku tyawun yaw na muhi kenu hani ga, siyan ci ga masu bayi iyu kenu lga, t’arin mosa m’ay khoni la, masu m’ay khoni lga, halan mhobin utux utux rtun loyi khoni, masu lga halan makut rasun mutu beh mhiyun kenu kya lru kyayan cikah wagi khoni wan utux utux rtun haca.

Tran masu kwara yaw na kmut khoni hani lga, t’arin ci muhi kenu la, ana ga khoni mhiyun kenu hani ’ran moyit lingun utux utux cipuy bling, utux khoni ga piyux lingun biling lru ba’un ta kiyuk iyu kenu la, utux utux bling ana spunan posa iyu kenu cahuy nya la, masu posa iyu cka bling khoni lga t’arin tmahok rosok si ttu kilux ci mhtu buba nya lga, masan ta bu’ rosak nku bling wan spunan mhiyun iyu khoni kya, su’un masan kwara ku bling khoni hani lga, le’un sbalay beh iyik syasi khoni nku nuhi iyu kenu haca ru le’un ta mumuk la, lhangan ta ttu tugan byacing, masu lga hkani syasi na pcyung mutu khoni nuhi kenu hani la.

suru ci lga le’un kble ru le’un sbalay nku halan posa nnuhi kenu na

khoni hani, crxun utux utux khoni nuhi kenu hani la, kwara tyawun ryax na yaw muhi kenu hani ga, memaw tehok tugan byacing ru payat byacing, nanu piyux calay yaw tyawun mhiyun kenu hani, ana ga su’un muhi kwara lga m’es calay lungan ta mita uyi, baha mcwa hani ka nyu naha pranga utux sali naha.

kwani iya ga tyawun muhi kenu na c’oli, ana ga mogi kenu hani siga skahun khoni kwara nahuw puni ga ble ci sokan, siga skahun nya kikay pkiyay kenu nya ga ana myasa ci texan kyayan na kenu haca ga ungat ana cipuy ble sokan, nanu bayi cimu kenu ga ble mita ru ble’iy smok, yaca ga mosa su thoyay bayi ble sokan na kenu.

109 年全國語文競賽原住民族語朗讀【宜蘭澤敖利泰雅語】 國小學生組 編號 3 號
種香菇

南澳鄉的香菇是最香最好吃的,不過種植香菇的工作真的非常辛苦而且很繁雜,從開始種植香菇前一個月時,要開始鋸木頭,而且也不是所有種類的樹木可以種植菇菌,菇菌有自己適合種植的樹木,所以也不可以隨便鋸木頭。

樹木鋸成一段一段的,鋸成段木後再晾乾幾天才可以種植香菇,不過種植前,段木表皮要刨成一顆一顆小洞口,一個段木刨完無數個小洞後才可把菇菌種植塞滿小洞口中,這時就要開始煮蠟油塊,蠟油塊煮至滾燙就會溶化,再用小刷毛沾上滾燙的蠟油刷至段木洞口蓋住菇菌,使之菇菌無法接觸到空氣。

這些工作做完成後,再將種植好菇菌的段木擺放好至陰涼的場所並包裹好開始養菌,養到大約三個月後,在菇菌養菌期間要先找好一處夠陰涼確定曬不到日光的地方,並架設好木柱架子要立的段木香菇的架子後,才要掀開養菌的包裹,再把段木搬至架設好的木柱將段木香菇立起排好成一排一排的,這種植香菇的過程才算完成。

文章資訊
文章年度109
文章編號3
文章組別國小
文章語別宜蘭澤敖利泰雅語
族語標題muhi kenu
漢語標題種香菇
文章作者朱愛美
漢語摘要