109 年全國語文競賽原住民族語朗讀【巒群布農語】 國中學生組 編號 4 號
Pali-uni qanivalval

Ma-aq dau qabas a qanivalval a sia miminis-av tu bunun a mapakahau, mopa patistuban dau sia tatini tu bunun a tanuduq, mudaan in dau ka metistu tanuduq tu bunun, uu tu, tupa dau ka petistuban i tanuduq tu bunun a tu, maqtu-ang saak minbaas i lengat i ni-i ang mataz. Uqna-un i mepataz ta matistu ka ima, aminun a masqanan matu’tu ka tuqnaz, uu tu muqna ang nepa tupa tu miqumis ang saak, ni-i ang mataz. Paaq pu-un qeng-utun istaa ka mumudan a, kankanun haan issia ta tu davaz, dikut haan taluqan masabaq, mopa manahip a tusasaus dau tu: “ Ii hii buu iang tuu~ ~ ” .

Kanaqtung in tusaus a tupa dau ka mepataz a tu: “Zaku ka mastaan matamasaz i qeng-utuk a bungu ka, ni-i in a qineng-ut i bungu ka maqtu bazbaz, samuq is babazbaz ang a bungu ka, sulan istaa ka bungu ki iningqalidangan tu pan-e-an a, maldauk ang babazbaz, mopa sinulan in i iningqalidangan tu pan-e-an a, ni-i in babazbaz, tupa ka mepataz istaa ka tu mataz in nepa ki, ni-i in babazbaz; kusi-a-an istaa ki qulbu madamu, muskun munkunbu haan danum; peskatudiip a mebungu ka min-uni qanivalval.

Paaq pu-un masamu ata mapatnu ki qanivalval i na mistaba ka ima, na kislosan. Ma-aq is na mapatnu ki qanivalval a masamu pisansanun a tanuduq mapatnu, maqtu kis piqutmu-un a ima mapatnu ki bintuqan. Ma-aq a madangqas sadu-an a meqedang; ma-aq a masinhav sadu-an a me-uni iningqalidangan tu vuus; ma-aq a masanglav a me-uni ininsanglavan tu vuus, paaq pu-un vevivevi sadu-an is qudanan, kapimopa ang lopa ko ka melalangna ki issia madadengaz sintaqu tu masamu mapatnu ki qanivalval. Mavia tu masamu mapatnu ki qanivalval i? Tis-uni tu tinquz-a-un saduu ka qanivalval un, sasuu tu mano-azdengaz sadu-an; sikopa ka minin-anak minheza sadu-an un a tumamantuk a madadengaz tu masamu masalaqit saduu, asa tu samasqing saduu, masamu katmang mapatnupatnu nai ta, mopa mastaan nenka tu kapanuun saduu, uka sekaskopa nai ta.

Paaq pu-un ma-aq saam a Bununtuza ka masamu matusqung i sikopakopa sadu-an tun, masamu amin maqenan nai tun, asa ata tu lusqa samasqing saduu, asa tu matunaskal i diqanin tu pino-azun a sikopakopa sadu-an mita kun, maqtu ata pesnane-an ta siza ki asa-un mita ma-un, maqtu amin pesna-ita siza ki na iskusia mita tu qemangsut, ma-aq is siza-un ta nenka makusia ka ni-i nenka mahua, manahip tismita kuzakuza, paaq pu-un ma-aq ata ka bunun a asa tu lusqa manahip miqumis haan nastu ti.

 

109 年全國語文競賽原住民族語朗讀【巒群布農語】 國中學生組 編號 4 號
論彩虹

彩虹的形成是由於酒醉的人打架,其中有一個人的手指被砍斷,被砍斷手指的人說,我還沒死我可以報復;那砍的人聽到後又再去砍斷他的手和骨頭,並且砍到手臂,但被砍的人說,我還沒死;那砍的人聽到後乾脆砍斷他的脖子,撿起頭裝在背袋,晚上留在山上的工寮過夜,非常高興在唱歌:「伊~~~~~

唱過後,那殺人的人說:我最有力量,因為我砍斷了他的頭,他再也不能講話了,但那個頭還可以講話,他就給他潑灑樹豆湯,還繼續講話,因為被潑灑樹豆湯,就不再講話了,那潑灑樹豆湯的人說因為我給他潑撒樹豆湯,所以他就不能講話了。

他已經死了,所以不能講話了。他用頭髮包住頭,一起進入水裡面,從那時那個頭就變成彩虹了。

所以禁止用手指指彩虹,否則手指會被燒掉或被燙到,如果要手指彩虹時不可伸直手指,要握拳手指頭來指彩虹。彩虹有幾個顏色,紅色是血變的;黃色是樹豆湯變的;綠色是蔬菜湯變的;下雨天時彩虹的顏色會變。所以布農族人的子孫仍然遵照老人家的囑咐。為什麼禁止用手指指彩虹呢?因為看到眼前一切自然形成的都非常驚訝,而且都非常漂亮,所以我們要用虔誠的心敬畏它們,一切的自然現象都很偉大。

 

文章資訊
文章年度109
文章編號4
文章組別國中
文章語別巒群布農語
族語標題Pali-uni qanivalval
漢語標題論彩虹
文章作者張玉發
漢語摘要