109 年全國語文競賽原住民族語朗讀【賽夏語】 國中學生組 編號 4 號
’iniyabiyal ka pinatiyay

hayza’ ’aehae’ hahila:, kapapama’an maray ’aehae’ ’ima ’inaro’ o leheh ka ra:an. ray ra:an kabih o kabih, pinamowa’ saeboeh ka pazay, pinatiyay maowahil a tomalan, ’ikahabiyalan saeboeh. kita’en nakhara ’am kayzaeh ila kipazayen! pazay sin’elan nak ’ima lohaha’o: ka pazay, ra:amen Sa’ hiza ka pazay koza’ kin mabaeh ka SiSi’ kin Sil’i: kita’en. hini ’ima mowahil pazay hayza’ Sinan’pispisan ka SiSi’ noka pe:es, kita’en ka pazay sin’el hayza’ ka ’iniya’olpoeh ray kalihoekan, pe:es ma’ ra:am raraylis ka kasi’aelen kilma’iyaeh. ’iwa’ noka ma’iyaeh pa’iri:’in ka ma’ma’iyaeh ray pinatiyay wazwaz. ray kalam langi: kita’en ma’ hayza’ ka tiniway ka kangkang. So: mabaeh ila ka pazay ma’ towa’isen paySiri:in ray pinatiyay koSa’en miyape:es. So: ka pe:es mowa:i’ ila somi’ael ka pazay noka ma’iyaeh haehli:in ka kangkang, kangkang ma’ kakalongkong homngas, pe:es bazae’ ma’ homayap rae:iw ila.

Saehpi:ih ’ima piza’ ila ka hahila:, may’isa: naehan ray pinatiyay, kita’en lasiya mam kipazay ila. pazay pinamwa’ mowahil a tomalan, ’anoka hima’ kipazay ’am hoenaehnge: ka hahila: sizaeh. nasiya ’anoka kikay monpilaz ka ’am lalobihlobih honha:i’ ma’ sizaeh ila kipazay! ray kabih ka ba:oz, pe:es ray kinipazayan sosmi’ael ka ’inonhae:ae’ ray ra:i’ ka kamez. komita’ ka pe:es honha:i’ homayap babaw honha:i’ kaSra:i’ somi’ael ka SiSi’, honha:i’ rini’ kabih ciit Sa’ honha:i’ riza kabih ciit Sa’, nakhara ’ima Siyae’ komSa’, “kaysa’an kin kayzaeh ’oka’ ka ma’iyaeh mowa:i’ Somowaw koza’ kin kayzaeh!” ’okik ra:ami, ’inay’ino’ ’ima kas’oehaez ’iniya’elngih o ’inyabolalas ka ’aehoe’, Sahoero: ka ba:oz ki pe:es mowa:i’ Somowaw ila! ba:oz ki pe:es homSeS kakamoeh homayap rae:iw ila.

hini ’isa: ray pinatiyay So: kipazay ila ma’ hayza’ ’ima pakaysawa’an ka kinita’. ’oka’ ila ma’ pakSekla’ ka minahael, kamaSomopazay ma’ hopay a tomalan, kayni’ kapinatawawan pak’a’abaSen, lasiya miyalawa’ ka pees, ’ita’ ma’ rengreng papahoero: hi nonak, ’izi’ ’aS’aSay ka kasi’aelen mita’.

109 年全國語文競賽原住民族語朗讀【賽夏語】 國中學生組 編號 4 號
黃色的稻田

有一天,車子經過一條又長又直的道路。路的兩旁一片黃澄澄的稻子,看起來可能快要收成了!稻穗下垂的彎度可見稻米飽滿的重量。這一大片稻田有一角被麻雀吃了稻米,成了灰色地帶,麻雀也跟農人們搶食。難怪田中央立了好幾個稻草人;田埂邊有一段拉繩,上面掛了好多的空鐵罐,當稻子飽滿的時候農夫就要常到田裡去趕麻雀,當麻雀一群一群飛來的時候,農夫就拉一拉繩子,上面的罐子就喀拉喀拉的響,嚇跑了那群吃稻米的麻雀。

過了幾天,再次經過這片金色稻田,農夫們正在收割。稻田面積寬廣不適合人工收割,看見一台機器來回來回幾趟便收成完畢!一旁來了好幾隻鴿子、麻雀一群在田中央啄食掉在田地的稻粒,看著麻雀上竄下跳這裡嘰一聲、那裡嘰一聲,彷彿高興地說著:「太好了!終於沒有人趕走我們了!太好了!」忽然,不知從哪裡冒出來一條黑白狗,看見鴿子和麻雀就一路追趕過來,鴿子和麻雀嚇得飛跑了!

這就是在稻田上稻米收成時,許多有趣的景象同時,也讓人們了解農人們的辛勞,我們時刻都要記得不可浪費食物。

文章資訊
文章年度109
文章編號4
文章組別國中
文章語別賽夏語
族語標題’iniyabiyal ka pinatiyay
漢語標題黃色的稻田
文章作者lalo' a taheS kaybaybaw
漢語摘要