109 年全國語文競賽原住民族語朗讀【郡群布農語】 國小學生組 編號 4 號
masamu ansasais masituhas i saitangus mas vali

A maaz dau a ituBunun a madadaingaz hai maisihabas dau tu mahahasam tatahu mas uvaaz tu “kakaa tu ansasais mas masituhas i saitangus a masituhas mas vali sadu at masamu mais ansasaisun.” A maaz dau a uvaaz mais ta’aza mas madadaingaz tu tu’upa mas saicin tu halinga hai na tu’upa dau tu maivia tu nii a masitutuhasan mahtu ansaisun is? na tupa dau a madadaingaz tu atunau i maaz a siaan tu sinhahasam tu halinga hai maisisiaanang dau sia mailantatangus tu sintatahu tu ishahasam mas uvavaz’az tu hansiap. Ung at, na tahu dau tu...

A masa habas daingazang dau tu niin haiapun tu uskukua bis sia dau tu tus’a hai aiza dau tu dadusa a tas’an a takisiaan sia dihanintan. Ung at, naia dau mais mun’apav sia dihanin hai musaisasais dau mais mun’apav i mais tandusadusa dau a naia mun’apav hai na masmuavin dau tu sanbahis daingazis sansinghal at na sanpaataz dau mas inastu sia dalahtan tu minihumis. Ung at, naia dau mais mun’apav siaan dihanin hai musaisasais tu ngangaus a masituhas a mun’apav at makuskinuzin dau a masinauba a mais mun’apav.

Ung at, inaiza dau tu tastuhanian hai makusnisnis dau a masituhas a at minmatadaingaz dau at sanpaatazun sia dau a isia dalahtan a ismut mas lukis at kaazin dau a duma a minihumis macisbai amin tunnangadah siaan laak tu ludun tunghabin i na sanpaatazun dau sansinghal mas masituhas tu valicia. ung at, tudii dau hai aiza dau a tastulumah a munhuhuma a bunun hai  sizaun dau a ubuh a uvaaz mapitanngadah sia hansal masubu mas haspan mapacinavung hai kaaz dau sansisiunun sanvali mas vali tu masituhascia mapinsisiun at haungun dau a tama tu maivia tu inmazaavun a uvaazan sansisiunun is? hai cismaupacia dau at mapatupa dau a naia tu na kavasunta a valian at aupa maisidiipin dau a tama a kaudii makavas mas valicia at masa tudii dau tu mudaan kaudii makavas mas valicia hai adasun sia dau a masituhas a babananaz a uvaaz a kaudii makavas mas masituhas tu valicia...

Aupa masa aipincin dau hai maaz a ituBunun a madadaingaz amin hai na tatahu mas uvavaaz’az mahahasam tu “masamu ansasais masitutuhas i saitangus mas vali sadu.”

109 年全國語文競賽原住民族語朗讀【郡群布農語】 國小學生組 編號 4 號
不可以頂撞兄長,因為,先見到太陽

這一篇文章是布農族人的長輩告誡孩子們倫理的諺語。

利用「征伐太陽」這則口傳中,父親為了報復太陽哥哥,將幼子曬成蜥蜴的故事,引出的倫理典喻。

文章資訊
文章年度109
文章編號4
文章組別國小
文章語別郡群布農語
族語標題masamu ansasais masituhas i saitangus mas vali
漢語標題不可以頂撞兄長,因為,先見到太陽
文章作者卜袞‧伊斯瑪哈單‧伊斯立端
漢語摘要