109 年全國語文競賽原住民族語朗讀【噶嗎蘭語】 國小學生組 編號 4 號
lazan na temaqsi

semaqay ngid taqsi medaud tu kiya ya leppaw niaq tu taqsian, mezaqis tu qitun menguda iku, qatiw pa kelawkaway tama, tina ku, qangid iku saqay matiw temaqsi melaydaw qaniyau, kasianem iku qasuppaR ti iku paqenanem, Raqana simsanu ti iku tu tama, tina ku, aiku pa ti semaqay temaqsi naRin ti temungaw, semuna timaikuan. semulul ti ya tama, tina ku, melilizaq anem ku, maken qanengi ti iku simunang paqenanem, ta saqazusa deddan, azasan na ti iku na tina ku qakelisa semaqay, semanu tu naqunian ta mezin tu lazan, semanu qaya paqenanem iku semaqay satawaR ka tu lazat seRay nianiana ta lanas. unnay, siangatu ti iku paqenanem semaqay temaqsi.

matiw sa taqsian yau ussiq Raya ay lazan kemuliseng medaud ma, muwaza qitun qaya, yau pama ussiq qazezena ay kitut lazan, azasan na iku na tina ku semaqay tu zau kitut ay lazan, ta uzusa kinil na lazan nizu zenna, maqayta ita tu pakuwayan kemuway ta zennan, muman nani metazuq ti, nazau kemuway metazuq ya pakuwayan haw zin na anem ku kasianem, unnay mai ti ta aneman ku ya lanas zau, makasianem ti muman nani maRawan ku meRiz puli ibabaw ti ya tazuq, nengi anem ta temyta, pitemawaR melaziw nani tumqez iku tu kikiya temaytayta, yau ussiq deddan pazakian ku temayta, matayta ku azu sasimau pa ti, padames ti iku mengasan metenes semaqay tu lazan zau, tumqez semaqay temaytayta tu zenna naquni ti ya qipenayan, Raynguan ku melaziw tu utani deddanan Rapedadaw ti ya qipenayan na zenna, masulun tu nisiyup na bali qeliwiqiw azu lain, maken simqenna taytan, ta lazanan mai tu qitun, mai ma tu lazat semaqay, ta lazanan maipil ay nani wanma suni na bali, suni na adam, yau qaya sengaz ku melalazuk semaqay, seRay suni na zapan ku semaqay, azu muzan, temuRang tu suni na uzan. mai qenidedan, maqayta ku yau kikay na qaypanay seRay pakuwayan qaypanay, bangsis singutan sanu na tasu niqaypanayan, maken ngid iku teqez mai ti iku ngid qatiw sa taqsian taqsi.

pitemawaR, mai pa tangzasan sa taqsi, maqezi ta leppawan nelalazuk melusit, melalazuk semaqay sa taqsian, ta nisanuan na tama, tina tu qaseqan ku tu leppaw, mai sululan ku kaput temaqsi tu qatiwan mawRat, melalazuk semaqay temanan, wanayka ta aneman ku ussa iku paqenanem, ta mai tu sunsuni ay lazan zau, yau simqenna ay zenna, tengilaw ay deddan, suni na kelukut, adam, azu yau qumRas ya bali, kitut suni na uzan sikaput timaikuan, mai ti iku pilay.

109 年全國語文競賽原住民族語朗讀【噶嗎蘭語】 國小學生組 編號 4 號
上學的路

學校離我家走路有點遠,我想我該獨立了,所以我跟父母親商量,要自己走路上學不用接送。父母親答應了,我很高興可以自由了。隔天,母親帶我走路上學一次,除了叫我認路之外,還提醒我在路上該注意的人事物。於是,我就開始一個人走路上學的日子。

往學校的路有一條是大馬路,另一條是田野間的小路,媽媽帶我走的是這條小路,小路的兩側都是稻田,看到農夫耕田、種下秧苗,之後一片綠油油的秧苗長高了,看了心裡很舒服,有一天靠近一看,發現很像長出花苞,慢慢的我在路上走路的時間更長,邊走邊看田裡的稻子如何變化,不知不覺變成一大片黃色稻穀,隨風擺動像波浪一樣,真美,路上沒有汽車,連人都很少,在路上能聽到的只有風聲,鳥叫聲,我趕路的呼吸聲與腳步聲,如果有下雨,還多了雨聲。

在這條寂靜的小路上,有美麗的稻田,有乾淨的天空,有蟲鳴鳥叫,風的呼喚,雨的低語陪著我,讓我不覺得無聊疲憊。

文章資訊
文章年度109
文章編號4
文章組別國小
文章語別噶嗎蘭語
族語標題lazan na temaqsi
漢語標題上學的路
文章作者潘秀蘭
漢語摘要