109 年全國語文競賽原住民族語朗讀【東魯凱語】 國中學生組 編號 1 號
’alakwa

kotaka so Taromak ni tokocingale ki ’alakwa lro iyata kaivai ka sa’a drangalwa ki cekelre, lro ikai ka baza ka ’abere ka atomana cekelre, si tama bolobolwa idra alrecega neta ka lra sawalray, lra mani kai tino kocingala ki ’alakwa, si ko nadroma sana mangealre si tolo ka mwa ’alakwa neta, si lro taw mo ’alakwa neta maelra ka ma ’adolo, ’alraysi mita ’aka tololro, lro amawng lrai ’aso ngalai mita ’ata geagea, lro kotrakili ta kwane sa aga amala idra sa totoha idra acilray, si ’awngolro mita lra mokolrodro ta, si lro amawng lro kabo ciyaciyaka ka ’a’ece ngamita, lro taw tarokoko lrai wata mari biribici idra tawdring, tringitring idra kisonaganeidra ma themeameace, lradavaceta mwa ’asabalre silra’e sa angato, lro kalredra kainganai ta maki to angealre idra angato kelra mo ’alakwa, lro kainganai ta wangalri si tawdring maredede, lraceelre naiya kai lra omase kwadra aswalra ka amani kwadra aswalra tringitring, amani kwadra ma themeace lra iya mita lro ceelre. lra sarareta ki angtata, kilralrava sa lro ikai ka atomana, lro kadrwa lra davaceta maw vaga vagay.

lro ikai yana ka droma ka vaga ka atomana, aidavaceta torodro si kainganai, si lro avalalisene ta kata siya ki’iki’ing siya ta sa edreka sa katrekatre, lro dadavace ta maliya metrelre ta, kata ma vikiviki ki alima ta si ango babiyabilra ta ki kaelea, inilinga lro madradresenge ta kaelea lalawa lra tangea ngerarane ta malalibate, lro amawng lra kelra ’alakwa yakai ka valalisene ’awa dromolo nakwa tengaba lraiya, kwadra marodrange kelra ’alakwa, lra dawlro mita ’akanaele ’atilribi, si lra kawriva bolo lrala idra ’ilri si ’awa mita ’ilri ’akanaele, lro momawma ta si kaita si oodo lro ceele ta idra wa oodo, amala ta ligiligi si wa swatedre lriniyana, lro wata hebele idra lra siya silranga ki lra habalreta, lro tatoko dralriya lriya ’awa ’atilribi idra aga kadrwa ka airo’a, lro kanekane ta kata aethe theka ototho, lra masilra silrang ta ’okidring masilra silrang ta swarare, kwadra mailreveng odrava lro kaiyana kabocoko sarareta si davace. si lra tara tolo ta ki caylri avalalisene ai ’abangesare nga mita, si kalralrekete ngata to’a’ala ki lra habalre mo’alra’alrng. to’a’ala lro avaiya momawma lro mwadraw, kai atomana wa dawdawlro idra lraretesa siwahebelre, si ko nadroma lro mo’alra’alrange ta kiyadolo ta, lrai wata swatedre sa saw ’alra’alranga lrai maka orivariva ta lro karathodo lrai dawdawlrota ki lraretesa ai wata ’obengelay lrai wangata idra a’alranga.

109 年全國語文競賽原住民族語朗讀【東魯凱語】 國中學生組 編號 1 號
青年聚會所

Taromak人非常重視青年聚會所,若有敵人或急事,聚會所都會幫忙,這也是教育男性的地方。

男性13歲開始進入會所。初始會禁食三天,晚上會被檢查誰偷偷吃飯,若被發現,就會被逼喝完大竹桶裡的水。晚上12點後才休息,公雞一啼就起床比賽搶臀鈴,還要去找柴火。

少年時只有穿短褲。要二手抱胸,低頭走路,若跟長輩相會時要讓路。若不遵守,長輩就會到會所告知,少年會被訓勉受罰。

去田地時看到長輩背東西,少年要主動幫忙背到家裡。也要幫忙會所裡的女青年工作。吃飯時把飯放在地上,沒有菜。吃飯時也不能打嗝及放屁。要同時開動、同時放下碗筷,若有吃很快的一放下碗筷,其他人也一起放下,還沒吃飽的也要放下碗筷離開。

少年要在會所三年後才能參加成年禮。

文章資訊
文章年度109
文章編號1
文章組別國中
文章語別東魯凱語
族語標題’alakwa
漢語標題青年聚會所
文章作者林得次、林慕妮
漢語摘要