108 年全國語文競賽原住民族語朗讀【噶嗎蘭語】 高中學生組 編號 1 號
semaqay ta lazanan na damu

taRbabi Rameneng ta leppawan ni bai, Ruqabatad deddan, paqanas iku mai tu sunsuni pasaya qayRuziq masengat, maynep pama lazat na pinileppaw, paqenanem iku matiw sa tati pasa tibuR iku semaqay. muzan qawqawman mai tebabal tu anem ku ngid lusit, kasianem iku, muzan yauzuma zuma ya nitaytan ta.

mai iku ngid siqawsua, kidadan na zin ku ngid saqay, wanayka, uzan zau ngid pasuppaR timaikuan tu muzan ti, azu Raya ti tu kiya uzan zau, tuRuz na maytis iku mangay Raya uzan, siqawsua ti iku melusit, siqawsua iku semaqay ta mai tu sunsuni ya lazan na pasa tibuR, paqanas iku semaqay wanma suni na bali, uzan seRay suni na nisengazan ku, suni na zapan ku semaqay, yau pama suni na uzan ta qawsua.

wanayka, suni zau padames semanu tu maken mai tu temuRes ay, kasianem iku, pasi maken ngid pasuppaR timaiku ya deddan qaninnanan ya mai tu temuRes ay, qawka paRaya tu kiya tu uzan! yau zuma yau ussiq, uzusa qitun malaziw, wanayka azu yau lazat temanuz ta tuRuz meqasiR nipasaqay na, miRRi iku ta kinilan na lazan kikiya mai ti maqayta ya qitun ’nay, kasianen iku tu “ qanengian na senaqay na qaniyau ta lazanan ”, semaqay ta mai tu sunsuni temuRes ya lazan na damu, maRawan ku azu sumdes ti tu ussiq puli tasu ay qudus ya naung, maipil yau suni na zanum semuRiR, miRRi iku ta qazqazan na lazing, maqayta ta bali na lazing seRay Rikum mawRawRat, mai satawaR mezuquR tu bettu azu tepuwaq ay simau temiRsas nengi taytan, tennes iku tayan azu tumqez ti sengaz ku, padames kalingunan ku utani ti duki, kalingunan ku ti yau iku ta qazqazan na lazing miRRi.

temuzus tu yau paqenanem tina ta tuRuzan qumRas timaikuan, qawka iku Rameneng, tawikan ku tiana ya tina ’nay Raynguan ku.

maRung pama lazan ta ngayawan, Raynguan ku melaziw ti iku tu uzusa damuan. qasukaw mai temadikud temanan zin na anem ku, paqanas ti nengi ya deddan qaya, meqidat ti waRi, qidat na sezang tumsuR tu lanem pasa lain, suppaRan ku qatatezuma ya nitaytan ku ta lazanan na temanan, tayta iku sezang nizi ta lazingan mezukat, mai ti ngid Rakat zapan ku, tennes iku miRRi ta qazqazan, taytan ku sezang paqanas nizi ta lazingan mezukat, yau ningu na ta lazingan meqiqidat azu belawan, pataz semanu ti tina mezukat sezang simqena lazing na damu, taytan ku ti tangi padames simqena nitaytan ku.

108 年全國語文競賽原住民族語朗讀【噶嗎蘭語】 高中學生組 編號 1 號
散步原鄉路

清晨從外婆家中醒來,一個人到外頭散步。雖然下雨卻不影響出門的心情,雨天是另一種風景。

走在寂靜的新社路上,聽到風聲、雨聲和我的呼吸聲與腳步聲,還有雨落在雨傘上的聲音。我想,老天是要我享受這份珍貴的寧靜,才把雨下得大一點。偶有車快速經過,我站在路旁目送它離開,心想著:「希望開車一路平安」。

走在寧靜的路上,仰望山巒,聆聽細雨呢喃,站在海岸邊,只見海風與浪花玩耍嬉鬧,撞起壯麗的浪花,我沉醉許久,直到一位阿姨叫喚我,才回神過來和她打招呼。

轉眼之間已走過兩個小聚落,回程的路上,天氣漸晴,陽光從雲縫中灑在海面上,太平洋的日出讓我看呆,站在岸邊看著日出昇起,陽光反射在海面上閃閃發光,原來媽媽兒時所看到的日出,比媽媽說的更讓我難以形容。

文章資訊
文章年度108
文章編號1
文章組別高中
文章語別噶嗎蘭語
族語標題semaqay ta lazanan na damu
漢語標題散步原鄉路
文章作者潘秀蘭
漢語摘要