108 年全國語文競賽原住民族語朗讀【噶嗎蘭語】 國中學生組 編號 1 號
kaput temaqsi

ta taqsian nani ta qenabinnusan munna matazai matapun tu mazemun ay lazat, kaput temaqsi ta taqsian ta qenabinnusan qenaninanan, ta aneman  Raya metabay niqizuanan na. kaput temaqsi muwaza naququni ay waway na, qanengi sakaputan, qanengi sasimsuqasan ay lazat, padames ay nani simqenabid ti ay lazat. puliya, niqatazian ku ay kaput temaqsi, qalabutan ay nani wanma waway na seRay ta qenabinnusan na yau kitut mesukaw na, qawman kaput ku, yauzuma simsuqas ta nitaqsian, wanayka qawqawman kaput ku qaya, mai temuzus tu meRaqenabid, zuma ay kaput temaqsi wanma simtawik ma ay, ta aneman ku wanma kaput temaqsi, Raqana ta taqsian azu mai naquni, wanayka melusit ti tu taqsian, nisanu ku tu kaput temaqsi ay, maqayta ti maken ay waway na naquni.

yau kelisa matiw iku sa leppaw ni udaw, suppaRan ku melizaq aizipna qeman tu mais, Raqana sapazeng iku matiw ta pabaliwan tu mais meRasa tu utani mais matiw saleppaw na, temangan aizipna tu tangan na leppaw taytan na ta liman ku ay mais, timangu mai tu sasanu tu “ wanay ”, wanayka taytan ta waway na zaizais na azu ussa maken melizaq, ipilan ku tu “ manna yau niana lanas ”, timangu semanu nani melizaq aizipna qeman tu mais, wanayka mai melizaq mimet tu palin na mais, ipilan ku maken ngidan ku walin ta izipan na ya lubus na mais.

yau kelisa qaya matiw iku sa leppaw ni utay melabin, semanu timaikuan ngid qatiw Rasa tu saqaqanan na tuRantuRabi, mipil timaikuan tu qanan? kuaya zin ku semulul timaizipana, niazas na temanan nani ulima unem Raya ay lubus miyenpaw, ngid ti iku qasuzep temayta, qanamu ti qanan kinnausa zau RaRaya ay miyenpaw zin na anem ku kasianem, timangu maniz na qeman, meRetut iku temayta.

yau qaya kelisa matiw iku sa leppaw ni angaw, ta taqsian nani pasinanganan na mazemun tu medaduna ay pataqsian, wanayka, maseq iku ngid tuqaz tu qinpan na, mai tu tebeRan zapan meRaqat ngid tuqaz, meRusaz nianiana qaRaynguan temayta niana ya ’nay, mai sazemaken mata ku temayta, meRutapa puniRan na qudus ya inpan na, tanian maynep aizipna ya zin na anem ku, taytan ku takan na nipisapatan patataqep ya sudad, matingiw tu kiya qaniz ti mesuRaw, meRetut anem ku tenayta timaizipana, pameng ma metawa aizipna. zau nizu simqanengi ay kaput ku temaqsi, semanu iku tazian patawa ma timaimuan.

108 年全國語文競賽原住民族語朗讀【噶嗎蘭語】 國中學生組 編號 1 號
同學

學校是人生中最早接觸的社會,同學在學校生活中佔了很大的部分。同學可以是朋友或對手。幸運的是,我所遇見的同學,有些個性比較麻煩,有些在功課上有競爭,但都是我的朋友。不過有些同學在學校之外,就會露出本性。

有一次我到utay家,我知道他喜歡吃玉米,特地買了幾支玉米給他,但他沒說謝謝,看不出高興的表情,問他有什麼事嗎?竟是不喜歡拿梗。他是班上公認最勤勞的學生,沒想到房間東西很多,非常雜亂,都沒有地方可以讓我踩。

另外有次我到buya家過夜,他說要去買宵夜,結果帶回來五、六大袋的麵包,我看了差點昏倒。

以上這兩位是同學是私底下比較誇張的同學,講出來讓大家笑一笑。

文章資訊
文章年度108
文章編號1
文章組別國中
文章語別噶嗎蘭語
族語標題kaput temaqsi
漢語標題同學
文章作者潘秀蘭
漢語摘要