107 年全國語文競賽原住民族語朗讀【郡群布農語】 國小學生組 編號 1 號
Iahlulua mas haludung

isian mas unghazavan tu talabal, malmananu a iahlulua kuzakuza. kaupahanian macingmut minkailas at macinsuu macinmananu kuzakuza. kaaz a haludung ka kaupahanian kahuzas, pishasibang, kaupahanian taimazavmazav anis mal-upacin.

miliskin dau a haludungan tu Langat i supah a kakaunun isian buavtan, supah amin a lipuah isian ludunan, kanaskalun tu talabal a daingianan, mavia a iahluluaan tu macinpataz kuzakuza tu? Nibin mahtu silili mas zaku tu mal’upacin manaskal i.

paha sia luklas a haludung mas iahlulua tu, ui! iahlulua, mavia kasun tu macinmananu kuzakuza tu, misasaana islunghu, masial aupa mais maszang mas zaku tu pishuzashuzas hai?

haitu, nii a iahlulua mis-u mas isaicia tu iskuzakuza, muksiahu tu macicingna kuzakuza at antalamun saicia a haludung tu, asa mais talabalang tu masangkun mas nakaunun mais hamisanin. paha sia nii tu mahtu mapinmamaaz mas hanian idiip pishasibang, satamal a haludung tu tai-aza, at mahainan tupa tu, aiskai!, taimangaz tu iahlulua, mazava mililiskin mas habasin tu napalkadaan i?

ma-aipi, kanahtungin a kanaskalun tu talabal, musuu tasbanin a mihamisan, taunasianin mas makakazav anis lapa-avan tu hamisan.

makaskas tu iahlulua hai, masvala sian mas hamisan, aupa supah a isaicia sinangkun kakaunun, musasu pisi-alunin amin isaicia lumah.

masupaav a dalah, ukain a namahtu kaunun, kaazin a haludung ka makazavat kikilkil, musasu tu masauhzang, at miliskin dau a saia tu, anamasial mais maszang mas iahluluacia tu mapalsanus mas kakaunun masa talabal, haitu istanahtahin.

kaazin a haludung ka kanmamaitmait maiaupa sian iahlulua tu lumah i na-asaang pakaunan mas manambuh tu kakaunun.

paha sia mita tu uvaaz, asa katan tu malusbut mais mapasnava siin malmananu mais kuzakuza, mais maupacia hai nanii tu mintatulun mais madaingin, at namalsisial a sininghumis mais habasin

paisnasian iahlulua tu makaskas siin haludung tu makasa, nakanak’anak amin katan haiap tu makua a napalansanan mas mita at naminsia a imita maisinin sininghumis, makua a nii tu mahtu sililiun mas mita i namiahdi mais habasin.

107 年全國語文競賽原住民族語朗讀【郡群布農語】 國小學生組 編號 1 號
螞蟻與蚱蜢

夏天,螞蟻們辛勤的工作。蚱蜢則天天唱歌遊手好閒。蚱蜢對螞蟻辛勤工作感到奇怪。

「為什麼要那麼努力工作呢?偶爾休息,唱唱歌不是很好?」

螞蟻仍繼續工作,說:「在夏天積存食物,才能為冬天做準備!我沒有多餘的時間唱歌、玩耍!」蚱蜢就不再理螞蟻。夏天結束,秋天過去,冬天來了,北風呼呼的吹,下著綿綿的雪花。

螞蟻舒適的生活,建了溫暖的家。蚱蜢只得去找螞蟻乞求食物充飢。
做事情要分清楚輕、重、緩、急,好好讀書、做事,就不擔心來不及完成。

從以上兩則動物的比較,我們應該清楚知道,哪一個是我們的榜樣,哪一個是直得警惕。

文章資訊
文章年度107
文章編號1
文章組別國小
文章語別郡群布農語
族語標題Iahlulua mas haludung
漢語標題螞蟻與蚱蜢
文章作者打亥.伊斯南冠.犮拉菲
漢語摘要