106 年全國語文競賽原住民族語朗讀【卓群布農語】 國中學生組 編號 2 號
Maqainan tu tamasaz

Tunganin ca inuluan han maklang tu qani’anan, na kitnga’in munhan sipulan masipul, manahip ca is’ang nak antala baqlu tu sinipulan, maca kitnga’in masipul la na tau in ca pangka nam, na min’unin azam masitauqas han sipulan.

Haan baqlu tu sinipulan, pacaisi baqlu ka kuciusingsi’, maca baqlu ka kuciusingsi’ a Bunun, madaqvas talmindu sadu’an maqanglac untu, matuqainan malkacia masisipul, qalna haiza nam ma kaipisingan han kuciusingsi’, maupa kivisi’ malkacia inam sinipulan tu is’ang, kivisi’ sadu inam sinhuzanghuzang han sipulan , maupata nam baqlu tu sinipulan.

Kitnga’in muncaan sipulan masipul tau in ca pangka nam, namuhazin tasa’qamisan han sipulan masipul, na siking munhan kaucaung, anaqat asa tu minmantuk minqasmav masipul. haiza tastuqani’an mul’uu masipul, tan’a lukla ca tataqu tupa tu, maca luklaca ngan na munhana dangi’an kuciusingsi’ ta kilim mi kuciusingsi’, Tiang, Tokduz, Lian, Umin, Ali, Soqut, cikopa ka luklacan ngan na kava munhan kuciusingsi’ ta.

Matukahanin dangi’an kuciusingsi’ a, makaming ca is’ang nak mapising, maupa muc’anang azak pasadu kuciusingsi’, ni amin cam maqanciap tu maaca sinkukuza cuna, luklacan punhan kuciusingsi’ ti, tititi’ ca is’ang mapising mukumbu. ihan nam hilav tupa tu, kuciusingsi’ haizin azam. minahan na cia kumbu’ tupa tu, mukumbu’ a. tau’un zaku ca hilav mapising ca mata sadu cia, ai! sadu cak mataisqang nga daqais sandauqlac ca nipun maqainan sadu zamun, tupa tu mulungqu’a, maca is’ang nak tinnac’ak, ukain ni mapising tu iniliskinan mukumbu’.

Tinan’a amin azam ihan acang madadaingaz palcicia kuciusingsi’ talmindung tu liniqaiban. tan’a tu malmananu’ dau pismali’, maca sinludaq mali’ a masqung nga masauqbung  papasting ca mali’, kalicoqcoq nitu maqtu taqdutan. asa amin azak pismali’.

Maca sadu mataisqang masaningsing matuqainan na kuciusingsi’, tan’a amin sin’aincun cia tu qalinga ha, muhibul li tain’an han madadaingaz tu qalinga, mukumbu han inak tu is’ang ciin inliskinan. minatudip pi’uni’un zaku ca kuciusingsi’ min inak sisilian tu bunun miqumic.

Icia ti qainan ni kuciusingsi’ tu tamasaz, min’uni inak macial tu iniliskinan.

106 年全國語文競賽原住民族語朗讀【卓群布農語】 國中學生組 編號 2 號
微笑的力量

暑假結束後,又是新的學期,更讓人興奮的是我們升上國中三年級,即將成為學校的大學長。我們的新校長是原住民,長得帥、喜歡運動、開玩笑,但是平時非常的嚴格,這就是我們新的開始。

國中三年級開始要認真學習,有一次要找校長,但到了校長室,卻不敢進去,因為當時非常的怕他,但是進去後校長竟然對我微笑,我當下沒想很多,就直接進去。我在部落也聽到了許多校長年輕時的故事,校長以前喜歡打排球,非常厲害。而且我也是特別喜好排球,所以從那次談話之後,就把校長當作榜樣。 

文章資訊
文章年度106
文章編號2
文章組別國中
文章語別卓群布農語
族語標題Maqainan tu tamasaz
漢語標題微笑的力量
文章作者何美玉
漢語摘要