adiyu diya na Piniyumayan tu sinasalem na akanen mu, mau na dawa, kalumayan, vurasi, vu’ir di uma’i diya, mawu nanta kinava’awan a saruma’enan. kana kurelrang muvalivalis da kakuwayanan mu, ulra lra pinalaharahan na Koba walrus di. na dinkalranan lra mu, kurelrang semalem da valikuway, kana maremicima’ nu semalem ta valikuway kema di. likudan lra miturus ta diya kana Nokay semalem da re’a, palru harem kana ulra i Kayloziyo na micepa remkedang sumukun kana sasaleman, tu ipatalratalram na micepa diya kema mu, inta kani i Valangaw ta pinidare’an lra na wari lra, mawu nantu kinarepauwa semalem da kiday kema.

kemay kanidu lra na Nokay micepa semasukun i dekadekalr da naniwanan di cacima’an da kiday, kana kipanadanadam lra kantu kakilungecan da sasaleman mu, pureha lra ra’emec kikarun datu sinaleman da kiday. nu semalem ta da kiday mu, putayhi ta, lralrepit ta diya kana calunan, di pucacemer ta diya, di nu ’aremeng mu, mukuwa ta diya puvuwa’a kantu ’apuc, kemaysayasaya ta cemavu. salaw ta da kauleulep nani na kiyakarunan. aymu, nu saya ’ami maruwa ta parepuwan kiyakiday meniwan, kemani kana micima’ nani na sinaleman, di maremucima’ kana duma na sinaleman diya di maruwa ta paka’inava data inuvaawan i ruma’, di marekakaduwan lra na mikikarunan kana kiday. harem na kiday mu, salaw pakamelri kanta i Valangaw, na muwa’uma diya ta mauwan mu, kaduwan lra na semasalem da kiday.

kemay kanidu lra markakaduwan lra na cau sahar duwa kani valangaw cimima’a da kiday di mulihu lra na kiday, nu duwa diya na mudadangi i Valangaw na cau mu, adikaadi patalram mekan, di mau lra nantu ipaka’inava na umiyagi ini na kiday.

anu miwari u mu, kadika lra udadangiya kani i Valangaw, ulra na mavur na kiday mu, adi ta vavulay da paysu nu mekan ta.

早期卑南族傳統農產品有小米、陸稻、蕃薯、芋頭、樹豆等農作物，也是經濟來源；隨著時代改變及東部糖廠設立後，轉型種植經濟效益較高的甘蔗，接著在農會技術指導下，也種植了鳳梨。最近幾年，農業改良場研發出釋迦。

成立釋迦產銷班，族人接受農業技術訓練，積極種植釋迦。種植釋迦需要施肥、拔草、噴藥、夜間授粉、一個個包裝釋迦等等工作，過程辛苦，卻能收成兩次，經濟價值遠較其他水果高；如此高經濟的農產品，不但改善家庭生計，也造就許多族人的就業機會，現在釋迦已成為特有的農產品之一。