Yo kaemang ho^ kako, ira ko mato kalangay a paliding ako, o cacokerohen no mako minanam a romakat; mafana’ to kako a romakat i, o toloay to a moli^ ko paliding ako. Mato’as mato:’as to kako i, itiya i kasofocan ako a romi’ad, cakayananan no mama^ ako kako to citiliday to maloloay a citingsiya^, lo:wi’ sa kako a lipahak, nawhani cipaliding to kako to no tirengan. Ona citingsiya^, o ’icel no tireng ko sapiparakat, o wa’ay ko sapicokay ta maringer ko moli^. Ano talacowacowa^ to a miholol i, caay papidaen, malo sapiyatayat to tatirengan a miondo^. O roma^ sato, ano mimaamaan to haw i, caloway to kako a talacowacowa^, saka tadamao:lah kako toya citingsiya^.

Maharate:ng ho^ no mako ko itiya:ay ho^ a demak, yo mihetatanam kako a minanam pakacitingsiya^ i, damaen no mama^ ako kako i kaikor, sowal sa ciira, “ Repeten ko handolo^, cokayen to saripa’ ko pawa’ayan, aka pasalaeno^ a minengneng, ’arawen ko ’a’ayaw. ” saan. So’elinay, miparakat sato kako i lalan, caka:t epo:d caka:t epo:d sa kako, hanihani^ masatoko^, hanihani^ miparakat, kinapinapi:na^ a misatiyotiyol a minanam. Halafin hala:fin to i, sawad hato no mama^ ako ko kamay niira, mato mafana’ay to kako sa ko harateng ako, saka maraay mara:ay to ko nipiparakat no mako, salipahak sa kako. Namati:ra i, aya aya samaanen ko piliyas? Aya aya samaanen ka epod? Orasaka, itira haca^ kako a motolo’. Kirami, sowal sa ci ko mama^ ako i takowan, aka ka talaw a matolo’, o sakafana’ no miso ko nikatolo’ saan. So’elinay kinacecay a matolo’ i, kinacecay a matongal ko fana’ ako, manina’ ako ko sakafana’ a pakacitingsiya^.

Tomatira makakaleto^ kako ato idang a pakacitingsiya^ a miholol, ano eca^, miyatayat to tatirengan. Tomatira i lalan, malalifet kami a misatahenay a parakat to citingsiya^. Tomatira, misawad to kamay a mirepet to handolo^, milawla^ a pakatawatawa^. O ma’araway i fatad no lalan i, saheto^ o pinaloma^, ato kilakilang, ato saepi’ay a fali^, itira mapawan ko masamaamaanay a roray, awaay ko kihar a ma’orip to romi’ami’ad. Kirami, maharateng konini i, ma’ilol mangalay a patiko^ to itiya:ay ho^ a ’orip.

Maolah kako toya citingsiya^ ako. Ano paka’araw kako to pakacitingsiyaay a tamdaw i, maharateng to ako koya i ’aya:way a ’orip ako, caay ka tawal ako tahanini^.

小時候為了學走路，有一台螃蟹車，學會走路以後，換成一輛三輪車，隨著年齡的增長，某年生日爸爸送我一台紫色腳踏車，我終於有自己的腳踏車了。

初學腳踏車時，爸爸扶著後座，我手扶好龍頭，腳踩踏板，眼睛看著前面。反覆練習多少次，爸爸放開雙手，我把握到平衡的要領，愈騎愈穩，高興之時發現我還不會轉彎，也不知怎麼下車，就摔車倒地。爸爸說學騎車不要怕摔，摔幾次就會騎了，每次跌倒就能領悟到一些訣竅、技巧。 

我們常約好友出遊，相互競速，也會放開雙手展現技術。看著沿途的美麗景致，讓我忘掉一切煩惱，真想讓時光永遠停留在這一刻。

我好喜歡我的腳踏車。每當想起往日騎車追風，奔馳在步道上的情景，真叫人難忘，點點滴滴，歷歷在目。