107 年全國語文競賽原住民族語朗讀 【建和卑南語】 國小學生組 編號 3 號
talaulepan temakesi

“ dering! dering! ” kema maruni na pararuniyan i kungkuwan, mau na katalaulepan lra na temakakesi harem, kemay takakesiyan mupacaran na temakakesi, salaw vuri’awan.

harem kani takakesiyan mu, ulra na kenanama diyan, lramu piwari mekan semavalr awlra di, ulra na menadanadam semenay da temarapuyuma,    ulra na venavalray datu vavalrayan, lramu adi tu pasekadi tu vavalrayan adaman awlra! ulra na maaiyup da vativatiyan, ulra na ’ema’au da danum.

kani i salripi mu, ulra na maaya’ kantu wadi, lramu ulra tu taturuwan da eman awlra! ulra na kipucacemel, lramu ulra tu nanayan i iyan! ulra na verarelrang di kikaselru kana sinsi. ulra na lremangar, lramu ulra tu eman piniangeran awlra! ulra na pasiyasiyas marengay, lramu adi maranger pakinger da cau! ulra na mahelrahelr mukuwa i caca’iyan.

kani pacaran kana lalinayan mu, ulra na malalinay da mali, kara’ara’araw kana mali. inakuwaya tu salingan a! ulra na malalinay datu kalalinayan i kungkuwan. na kalalinayan i kungkuwan mu, sadu di marekamelrimelri, ulra na mukulukulung kani dadare’, lricalrica’ lra peniya tu kavang.

nu haremaremay mu, kinger ta da kemesikesik. nu haremaremay mu, kinger ta da ’emui’uy di pa’avut lalikeliked. salaw semangal na temakakesi.

ingku mu, marelrang ku kani ngidalri, mukuwa mi mena’uwa kananiyam sinareman i likudan kana takakesiyan. ulra a kulang, a kudumu, a vulasi. niyam vicevicaw na temelriyu diya na carunan; niyam ’avangaw na ’ured, niyam lratuday. nu eman mu, mukuwa mi mena’uwa da ’apuc. sadu na muvakar lra na ’apuc, salaw ngulringulr.

“ dering! dering! ” kema maruni lra na pararuniyan. mau na usasavak ta lra kani takakesiyan, takakesi ta lra.

“ makuda kana dika mulavat ini na katalaulepan! ” kema mi na temakakesi diya. na kadu diya i pacaran na temakakesi mu, himilrehilr pavekas mukuwa datu takakesiyan temakesiya! na mawili diya i pacalanmu, kikaselru lra kana sinsi.

107 年全國語文競賽原住民族語朗讀 【建和卑南語】 國小學生組 編號 3 號
下課

「鈴鈴鈴!」鈴聲響了!是下課時間,學生從教室衝出來,很熱鬧耶!此時,教室裡有人在吃早餐,有人在學唱族語歌、中文歌,有人在寫作業,有人在唸故事書,有人在喝水。

走廊上,有人去找弟妹,有人去醫務室,有人在追逐,正好被老師碰上而挨罵!有人在發呆,也許有心事!有人在說悄悄話,有人匆匆地要去上廁所。

運動場上,有人玩球,搶來搶去,流了滿身汗。有人玩遊戲器材,有人在草皮上翻滾,弄得滿身是草。

我和好朋友到教室後面,看看我們種植的青菜、玉米、地瓜。拔除長出來的草、捕捉吃青菜的蟲,長得密集的地方就間拔。有時也會去看花,花開了又香又好看!

「鈴鈴鈴!」鈴聲響了!是上課時間。「十分鐘的下課時間,怎麼過得這麼快啊!」學生說,不論在任何角落的學生,都紛紛地奔向自己的教室,上課去囉!還在外頭流連忘還的,就被老師罵了!

文章資訊
文章年度
107
文章編號
3
文章組別
國小
文章語別
建和卑南語
族語標題
talaulepan temakesi
漢語標題
下課
文章作者
洪渟嵐
漢語摘要