nizu yau lanas na lazat na pinilepaw, paqenanem ti iku masubulin ta leppawan.

masang pataz iku meRaputuy azu paqenanem ta leppawan, kasianem tu paqenanem mai tu lazat ta leppawa, ngid qawRat tu nianiana uu ngid quni, ngid qan tu naququni ay, nizu qasukaw zin na tama tina ay, mai tu lazat meqayla qanengi ti iku qeman. wanayka, tangi deddan maken mai tu lazat meqayla ay, ta aneman ku mai sasetaR tu kenasianeman ku.

paqenanem ti iku masubulin, mai tu lalazat mai tu sunsuni ta leppawan, temayta tu tilibi nani? nizu qalizaqan na tama ku temita ay, mai iku melizaq temita, ta setangi deddanan, ngid lusit tama ku, tayta ka ti aisu niana ngidan su tayta tu tilibi zin na, timangu tatalinan ku tilibi kemilim tu sataytan, Raynguan ku tu niana ngidan ku tayta, qangi ma  kemilim tu sakelawkawyan na leppaw, yau tina ku ta leppawan nani pataz meqayla timaikuan, simmeng tu saqsaqayan mai ngid panmu kelawkaway tu zana leppaw, mai ti ngid tayta timaikuan, qumRas timaikuan pasinap, semupas tu tipan na leppaw, meRasa tu Ribang na leppaw, temuluz tu muwaza sakelawkawayan, ta setangi, melusit ti tina, kingngan na ti iku ta leppawan, wanayka, ta setangi mai iku tu sakelawkawayan, liwaliw mai nengi ya anem ku, manna senazau zin na anem ku, hibangan ti, ussa saqsaqayan ti ni.

tuRuz na yau ti paqenanem kaput ku mipil tu dingwa, munna imi simtawik nani qawka iku mipil timaizipan na, qemuni aizipna tangi.

manna? seking? manna Raynguan ku? utani deddan setangi? ay ya! seking pa ti temawaR manna Raynguan ku ti, kalingunan ku ti? simunang iku madded tazian, mai tu kaput mawRat, ussiq tima deddanan? naquni ya ka ti meliyan tu sudad, mai ti iku tu anem ngid qawRat! mai ti iku tu anem tu qawRatan! ta tangi deddanan melalazuk ti ku meliyam tu sasekingan.

今天家人有事外出，只剩我一個。

在之前，一直期待這天的到來，幻想做平常想做卻不能做的，吃平常想吃卻吃不到的，盡情玩耍。只是，這天到來時，心中卻和自己所想的不一樣。

家中空蕩蕩的，看電視嗎？爸爸老是看我不喜歡的節目，今天他把電視讓給我了，我卻不斷轉台，不知道要看什麼；來做點什麼吧？平常覺得媽媽看我不順眼，叫我掃地、買東西，但現在我卻因為沒事可做而感到無聊。

考試？天啊！現在是幾號？明天要考試，我怎麼都不知道？我還悠哉地坐在這裡喊無聊，我要怎麼準備考試？不聊了！我今天可要忙死了！