106 年全國語文競賽原住民族語朗讀 【卓群布農語】 國小學生組 編號 2 號
ihan ludun

Ihan ludun miqumic, maca tingmut min’anuqu tinceqnal ca mata’ musu sadu isipal manauaz a ludun, malqaqalmang ca lukic ihan ludun maldadaqvas malqacivung tinduduldul, maca kaliluvluvan na, muhaz kaupa lisav ciin ciqi ca vovoqvoq maupas tusasauc tanaun, maca saduan a maszang is kimpi’ a tu malkukundoq ni tu qalmang huzanghuzang.

Ihan ludun miqumic, pipitpit ca mata sadu vaivivaivi ka taldaing a muut, madia ca ni tu mamasazang tu puaq, maszang ngi pintata’akapupuaq, asat sadu’an tu cimaqa ca mastan manau’az sala ka puaq, maszang puhun na binanau-az manau’az sadu’an , mahancum sakun, maca kaliluvluvun na, pisnau’aznau’az ca bungu’ pistataqaz is manau’az a daqais cia, kalihahancum pasak ki hancum cia.

Ihan ludun miqumic, kilim ata makunduq tu lukic, paluqun istai inita tu lumaq, matas’i luluman ba’bu’ ciin palqanvangan, siza ata lakda’ isqutun min’uni balung lumaq, kilim maqaipi tu lakda tuhulun matas’i min’uni  bistav issu’ia tatavi, siza lakda’ matas’i baning dangi’an pit’ia mahanat pan’dai’an, tinlukic mabulcuk tu lukic, ispalusapuz pitdia qaising makaling ngi sanglav isqul.

Ihan ludu miqumic, sadu ata lukic ciin muut, tal’ia kapupuaq manau’az tu puaq, pitaisqang pinau’az i sinidu’an mata’, minahan manau’az puaq tu sinidu’an mata’, mapinahip i is’ang nita miqumic, minahan ata lukic ciin ismutun sadu puaq minlac mimabulav mimadavuc, siza’un ita min’uni is’iqumic nita han ludun, madia vaivivaivi tu lac ci lukic ciin ismut, maqtu kaunun ta bunun, haiza amin na lac ci lukic ciin ismut ta ni tu maqtu kaunun.

Ni ata maqtu uka a ismut ciin lukic, altupat malqaqalmang nga cui su, maca uka cia lukic ciin ismut ta lac ca, na ma’aqa ca maqtu balivun ni cui su kaunun? altupa minkalimuci’ maca ni’in na dalaq tal’ia’as lukic ciin ismut ta, na maca kaunun ta bunun han nastu ti?

106 年全國語文競賽原住民族語朗讀 【卓群布農語】 國小學生組 編號 2 號
在山裡

一大早睲來,睜開眼睛是青翠山林、直立的樹叢,一陣風起,舞動綠葉及枝節,發出沙沙歌聲,枝幹如衛兵一般站著。 

每天看到各樣植物開著,想展示自已的花瓣,像少女般的艶麗帶香,讓空氣充滿花香。 

我們找了堅硬的樹,砍造建築材料,取石材疊成牆壁,找平石蓋屋頂,拿石頭作爐灶,取乾材生火。 

我們看到植物盛開花朵的過程,增添了我們活著的樂趣,也看到植物花朵形成果粒,成為我們的食物來源。

我們離不開植物,就算我們錢財萬貫,如果土地長不出植物,我們能吃什麼食物?

文章資訊
文章年度
106
文章編號
2
文章組別
國小
文章語別
卓群布農語
族語標題
ihan ludun
漢語標題
在山裡
文章作者
蘇秀華
漢語摘要