pantola mainca. ho isi talʉi ’o tfua’a homo muni. mais’a mo na’no ’ae’aenguzu. mais’a mo teʉ’tʉmʉ no isi payo’a ci macucuma. ’o koiyo mo mais’a mo na’no tmunanac’o homo muni. mais’a ’ola ma’susuae cimo peiskuv’o.  mosucula ahtu baito hoci iepoepohʉ toesoso ’o tfua’a ho koiyo? osu aiti honci iepoepohʉ peispak’i? la nana na’no yupa kuzo ’o tfa’a ho koiyo. e’vono mo meoisihe ’o koiyo. mo mipak’ihe ho isi aiti. la at’ingi ngoheʉngeʉ to tfua’a. o’a las’a smeecʉ’ho ohcum’u to tfua’a.

lahe yainca ta mamameoi. mais’a latocu at’oca ʉmnʉahe ’o koiyo homo mi’ʉ’ʉteʉ. tata’ia honci meelʉ mais’a to hia ‘ʉteʉ to koiyo ’e haahocngʉto. ko’koeno ho lac’u fiho e’ohʉ ’e micu saasmoyʉskʉ ci ’o’oko no haahocngʉ. honcicu amako mayo no fuzu ho nomo maamtanʉhe ci yuansou. tac’u peela sito teofsʉ ’o ceopngu no hici. tahe ko’ko osnia honga ho micu saasmoyʉskʉ. a’vinano cohivi ho pano ohsicula meoino hi’hioa. 

o’ucula talʉi to mamameoi ho ohela engha ’e h’oehanva no tfua’a ho koiyo. mo maica ’o o’ula talʉi. mosoc’ola nana conoemoo ’o tfua’a ho koiyo. mosoc’ola totiski ’o mi’a’ausnahe. la na’nosino yuyuso ho e’ohʉ. la acni opoepohʉ honci mayo no fou. la meelʉ yupa nananghinghia.

moso cono feʉngna. moso seolʉa no hosoyʉma. mo na’no soyʉmʉ. moso mayo to micu oemi’mi ci tuapzu. yonto feongo ho soupuzu ho ngicu. micu yupeahngʉyʉ ’emo yoso. mo mainca ’o tfua’a. ta fuengu tan’e. mainci acʉhʉ na’no yonghu ’o mocmo ci zomʉ. acʉhʉ na’no tmuseolʉ homo muni. na a’to, o’a mito yonghu, o’a mito tmuseolʉ, mo yut’ingi ’o koiyo ho mainca. cimo maezo maica co ’tohʉngʉ’u. la’u ’aoka ta’sosohpoza eni. at’ingi o’a os’os’a cohivi te mainenu te ʉmnʉ. “ te maica. tetoc’o tposi ”. mo mainca ’o tfua’a. “ nenu nate tposi? ” mo tuocosʉ ’o koiyo. “ ’a teno tposi ’e m’um’uto ”. mo yut’ingi ’o tfua’a. “ zoueno! teno anova engha. ’a tetocuno ahoza tposi! ”

micu taseona no hucma. mo auyu bochio ’o koiyo. isi aiti homoc’o aucunu kua’onga ’o tfua’a. na’no ’oha yonghu. isi ta’sona ho tena sʉ’no ’o tfua’a. o’a isi totea honcicu bochio ’o tfua’a micu ae’mu pkaako. ahoi ne mio. ’anamosos’ala ahtu noepohʉ. ho ac’ʉhʉ main’e ho na’no yupa kuzo.

烏鴉的叫聲緊張，像找尋遺失的東西，老鷹叫聲孤獨，像做錯事在後悔。聽說烏鴉和老鷹無法友愛相處，老鷹較大隻卻不敢接近烏鴉，為什麼？

成年男士若獵過山豬以上的獵物，就有資格插老鷹的羽毛，別人可以看出他有過英勇的事蹟。大家不歡迎烏鴉，會想到不吉利的事，也沒有人會拿烏鴉羽毛插在帽子上。事實上，烏鴉和老鷹都會偷竊人類所飼養的小型動物，我們是否被外表所欺騙？

烏鴉和老鷹原本長相一樣，經常一起狩獵，也一起食用獵物，彼此友愛。

烏鴉說我們用畫的。

烏鴉拿許多顏料認真畫老鷹的羽毛，而老鷹畫烏鴉時已是深夜，因為很睏，就拿木炭往烏鴉身上隨意塗鴉就睡覺了。

早上，老鷹看到烏鴉全身黑色很難看，趕快逃走，從那時起就沒在一起過，彼此仇視。