kasicuayan a qinaljan nua sepayuan ayatua nekanga nu dingki a pulinglingtj, saka kedri avarac a maqati a tjakanen a nemanemanga avana sika namasan pazangal aravac tu kemuda a penadjeng tua lami tua kakanen, sa inika sikapalakan nua kakanen, namasan pazangal aravac aicu a sengsengan. izua martimaljimalji a sipadjengan tua kakesain, a maru: a vurasi izau nu ljuseljusen nu cadapan sadrasi-i a pautad, pai maqati anga a pakacuacuain a penadjeng, nu kaljaqudjaljan nu kalja uraman anga izuanga lami a kesain.

mamaw uta a vasa puitaita a kivasa nu ita cavilj, nu namaljeliyaw a vasa tazua cavilj, maqati anga pasa lekuin a vasa sa capa-i, sa sanaradj, pai saka maqati anga a pakacuacuain a penadjeng tu kanen nukaljauram na tacemkeljan.

pai kasicuayan ka nekanan nu ping-siang i qinaljan, kudain a penadjeng tu inika sasequ a vutjulj nu aya itjen, aven anga a velang a namasan papadjengan tu vucutj i pasanavalj ta se payuan, patjetucu aicu a venaleng namasan paravac saka sanguqan anga tua kakanen nua senavalj tua sepayuan.

tja kudain nu venaleng tjen? azua tjauculjuin a vutjulj puqatianan tu pacengceng tu inika sikasasequan, sa duveci tua tjauka adradj a pinuqatianan, sa pasa tua kapua-i tuki galasu a kana, sacaqevi sa vengtji a remukuz tu inika maqati a mavali, nu inika namarukuc a vinengetja saka savali saka sakuya a valeng. pai aicu a nemaljenguaq a valeng, maqati anga pakacuacuain a liaw a cavilj. nu namasan paravac a qadaw nu izua qaljaqalja patjevutain anga aicu a valeng sasan siavianga sapakesan a seman siaw tua aradj tua zuma kakesain nua sepayuan.

aicu a veleng sedjalep ita kaljaqudjaqudjaljan katua kakavuceleljan a tja sansiaven, tjaljasanguaqan a sisiyaw tua kinsa a cinvasa a vasa a adradj. itua namasan pazangal a palisian uta, nu izua qaljaqalja i tjumaq, nu qemaljaqalja tua qaljaqalja i qinaljan tjalja sanguaqan tua kakanen aicu a valeng a siaw. aicu a valeng namasan sikipucemcemel uta nua vavayavayan nu na pualjak, sipaseljeseljec uta tua ramaljemaljeng nuna saqetju nuna kipuparutan. pai aicu a valeng namasan paravac a ravac tua kakanen i pasanavalj tua se payuan saka nakuya nu inika tjen a kitulu tu kemuda a manaya seman kakanen tua patjara venaleng.

過去部落生活因為沒有電，因此糧食的保存方法就很重要了，如：地瓜削籤或削片曬乾，就可以將地瓜保存期限時間拉長，在雨季或缺糧有存糧可以食用。

又如一年只收成一次的芋頭，如果當年產量多時，可以藉著火窯烘烤芋頭成為芋頭乾，因此芋頭乾就可以更久的保存了，也可以做成芋頭粉包傳統粽，美味又實惠。

而沒有冰箱的傳統部落，肉品的保存就是要靠肉品醃製；因此醃肉就成為南排灣傳統保存肉品最有效方式。 

醃肉的製作方法如何呢？先將新鮮的豬肉放入適量的鹽巴，及清水洗過的並敲碎的芋頭乾與鹽攪和，一起放入甕或玻璃瓶，就可存放很多年，在重要的日子裡或有賓客時，才拿出醃肉煮湯享受美食。

醃肉適合在冬季或下雨天時烹飪，配合水煮芋頭乾是絕佳的美味。在重要的慶典，或有家裡重要客人，招待部落的賓客使用的佳餚。醃肉也是婦女生產之後補身體使用的藥材。醃肉是南排灣的傳統美食中的好料之一，也是部落耆老們的美食智慧傳承。我們需要學習這份傳統美食的製作方式。