yami ’aehae’ taew’an ’okik haeba:an hayza’ hi yaba’, ’oya’, yako, ’aehae’ minayti’ kamamanra:an, roSa’ minayti’ minkoringan. yami ’aehae’ taew’an SayboSi: mae’iyaeh nanaw.

yaba’ kayzaeh a tomal, siya Sapang kamatikaehaew paSanbaba:ok o malahang ka taew’an niya’om. nisiya kiniSka:at ’okik ’ibabaw ’ana nakhiza, ray kapatawawan ma’ makakreng ’okay honasamez ’am matawaw, noka tahoki’ rengreng rokolon.

’oya’ niya’om sawsawa’an nanaw, matawaw ray taew’an, ’oya’ ririm’aenan minremreme’ ’i’ini Serra: min’itol ila, tikinhaema’ tal’awan ka kasi’aelen ’iniya’om. sizaeh komhaema’ ma’ Somater hi laminayti’ rima’ ray kakiSka:atan. lobih ray taew’an ma’ ’okay Sangay sowiti’, rima’ ray katibae:iwan ka tatimae’ bae:iw ka kasi’aelen. lobih ’ay taew’an takayba:en, baehi’ ka powawan, somapoeh ka rape:. So: yami patae’aes ila ’am kiSka:at lobih ray taew’an, ni ’oya’ ma’ kayzaeh ila tinalek kakoSa:o’on.

’aehae’ hahila: ni ’oya’ kapatawawen ’akoey a tomal, siya ma’ ’okay koSa’ hopay. So: ray kaSangayan, yaba’ ki ’oya’ ma’ rengreng maraS hi yami rima’ manmanra:an.

minayti’ ma’an hahi:il ray kam’ol’olae’an kakiSka:atan ’am kiSka:at, ya:o ray kam’ibabaw kakiSka:atan ’am kiSka:at. ma’an minayti’ kamamanra:an ra:am homoba:ang, minayti’ minkoringan minowa’ homlal. ’aehae’ naehan minayti’ minkoringan siya ra:am kiSka:at, rengreng mari’ ka sina’oe’an. yako minowa’ ’ae’ae:aew. yaba’ rengreng mayaka:i’ hi yami, So: hayza’ nonak ka hin’az’azem, ma’ Sowaw nimon nonak ka kinSiwa’an, pakakreng kiSka:at, ma’ tatoroe’ pak’akoey ka ’ima ’okik hingha’ howaw, kayzaeh mayhael ’okik tikot, ’oka’ ka ra:an ka’oSa’an.

sa’owaz! ’oya’ ki yaba’ naka kikay, ’ana koza’ kin Sil’i: pinama’ ma’ haSa’ ka kinhopay. mayhael yami ’a’ibabaw ila, yami ila ’am komalahang hi ’oya’ ki yaba’. ma’alo’ a tomalan ni yaba’ ki ’oya’ ka kinalahangan, ya:o ma’ ’am komilwa’is kiSka:at mayhael tikaehaew ila, kayzaeh nom komalahang hi yaba’ ki ’oya’.

我們家人口不多，爸、媽、我、一個弟弟、二個妹妹。我們一家有六個人。

爸爸是我們家主要的經濟支柱，他沒有很好學歷，即使如此，在工作時，認真打拼，經常受到老闆讚賞。

我們的媽媽總是帶著微笑，主要從事於家務，媽媽一大早天未亮時起床，煮早餐為我們準備好食物，吃完早餐即送弟弟妹妹們到學校。回家沒有稍作休息，又到菜市場買食物，回來再洗衣服洗碗，清潔打掃，當我們從學校放學回到家，媽媽也煮好了晚餐。每天媽媽的家務非常多，她從來不叫累。休假時，爸爸媽媽也常常帶我們到處走走。

父母親的確像機器一樣，背負的多沉重也不喊累，等我們長大了，換我們照顧父母親。